పుష్పా వేదన

 

                           కొక్కురోయని కోడియు కూత కూయ

                           వేకువందునే మేల్గాంచి వివస మొంది,

                           దైవ పూజకు పూలను తేవ నెంచి,

                          పూల తోటకు నేగితి పూలు కోయ,                                         1

                                    జాలి కురిపించు జంధ్యాల పూల కవిత
                                    ఎచట నుండియో వినిపించె అచట నాకు
                                    మనసు మార్చుకు కొమ్మను విడిచి పెట్టి
                                    వట్టి చేతుల ఇంటికి పయన మైతి                                            2

                                   పయన మవుతున్న నను జూచి మల్లె యొకటి
                                           "వెళ్ళి పోబోకు మిత్రమా! వెళ్ల కనుచు "
                                   నేల పడియున్న పూలను నెత్తి జూపి
                                   దీన మలరగ వినిపించె వింత కధను                                          3

                                  వాడి రాలిన మము జూడ వచ్చి నావ?
                                 పూజ కొరకునే పూవులు పూయు ననుచు
                                 భక్తి శ్రద్ధతో మమ్ముల పట్టు కెళ్ళి
                                 పూజ చేసెడి వారు మీ పూర్వ జనులు                                            4                               

                       రంగు రంగుల పూవుల రాసి పోసి, 

                       ఊలు దారాలతో మమ్ము మాల గూర్చి 

                       స్వామి మెడలోన మము వేయు సమయ మందు,
                                        ఎంత ఆనంద పడితిమో ఎరుక పడదు.                                       5
 

                           మంత్రపు నీళ్ళు జల్లి మము మంత్రము తోడనె పూజ చేసి , యా 

                     చెంతన యున్న భక్తులకు చింతలు పోవగ ఇచ్చి నంత , వా   

                     రంతయు పూజ పూవులని ఆత్రత తోడుగ చేత బట్ట ; మే 

                          మెంతగ పొంగి పోయితిమొ ? ఏ తరి చేసిన పుణ్య మంచు చున్        6   

                          నూట ఎనిమిది పూవులు పూజ చేసి
                                     మంత్ర మంత్రంబు కోక్కొక్క మహిమ జెప్పి ,
                                    స్వామి పాదాల చెంతన జార విడువ  
                                    ప్రభువు సేవకు ఉపయోగ పడితి మనుచు                
                                    అమిత ఆనంద పడితిమి అబ్బురముగ                                       7  

                    

                         పూజ చేసిన వాడిన పూల నన్ని
                                    భద్ర పరిచియు మర్నాడు పదిలముగను
                                    తులసి మొక్కల నడుమున తురిమి యుంచి
                                    జలము నర్పణ చేసియు జార విడరె !                                         8

                                   గోళెముల లోన మట్టిని గుమ్మ రించి,
                                   మొక్కలను నాటి ప్రతి రోజు మోద మలర,
                                  నీరు పోయుచు ప్రాణాలు నిలుపు మీకు ,
                                   పూల నిచ్చెడి సంతృప్తి పొంది నాము !                                        9

                                    పెండ్లి కూతురు అందంబు వెల్లి విరియ
                                  మల్లె జాజులు జడలోన మాల తురిమి
                                   బంధు హితులంత మెచ్చుతూ పరవ సించ
                                  జన్మ ధన్యత అయినంత సంభ్రమొందె !                                      10

                                  సభల యందున సత్కవుల్ సత్క రించ
                                  పుష్ప గుచ్చము లిచ్చుచు ప్రోత్స హించ
                                  వారి గౌరవ మంతయు మాదె అనుచు
                                 గొప్పగా మేము చప్పట్లు కొట్టి నాము                                        11

                               హరికధను చెప్పు హరిదాసు హార మందు,
                               పూల దండయే దాసుకు ప్రోత్స హమ్ము;
                              హరియు నామమె ప్రజలకు హర్ష మనుచు
                               బ్రతుకు చున్నాము ఇన్నాళ్ళు పరువు తోడ                              12

                               సిగను ముడుచు కొనెడి చిరు పూల దండయే,
                               భార తీయ స్త్రీకి గౌర వమ్ము ;
                              పెళ్లి రోజు తెచ్చు మల్లె పూదండయే
                                ప్రియుడు సఖికి ఇచ్చు ప్రేమ గుర్తు !                                           13

   ప్రకృతికె కాదు జనులకు బహు విధాల
అందము తొ బాటు ఆహ్లాద మంద చేయు
మమ్ము వెలి వెయ మీ కెట్లు భావ్య మయ్య?
ప్రజల కుపయోగ పడ నట్టి బ్రతుకు లేల?                                  14

   అడవి కాచిన పూలలా అంత రించ
పుట్టి గిట్టిన మా కెట్లు పుణ్య మబ్బు?
ప్రభువు సేవకు ఉప యోగ పడుయు నటుల
సాయ మొందించి మా పట్ల జాలి గొనుమ?                           15       

అనుచు పూలన్ని నా మీద ఆగ్ర హించ
పూజ సరిపడ పూలను ప్రోగు చేసి
పూల నర్పించి దైవాన్ని పూజ చేయ
పరుగు పరుగున ఇంటికి పయన మైతి !                                   16

                           వెళ్ల పోబోవు నన్నట  వెళ్లనీక,

ఆపి వేసింది అటను ఓ  అవిటి పూవు

అవిటి వారిపై మీకేల? అలుసు అనుచు

జాలి గొలిపేడు  గొంతుతో పలికే నిటుల!                              17

అవిటి పూలపై మీ కింత అలుసు తగున ?

పనికి రావంటు  మమ్మిట వదిలి వెళ్ల

దైవ చెంతన యుండియు  సేవ జేయు

భాగ్యముయు కూడ లేదంట భావ్య మగున?                        18

 మేము చేసిన పాపంబు ఏమిటయ్య?

అవిటి అనుచును మమ్మిట అలుసు జేసి

పార వేయుట ధర్మమా? మానవులకు

మానవత కిట్టి యోచన మన్న నగున ?                             19

 అవిటి పూవులు పూజ కనర్హులనుచు

వీధి బయటకు జిమ్మియు వెలియ వేసి,

కాళ్ళతో తొక్కి మసి జేసి కాల్చ తగున?

మాన వత్వము మరిచిరా? మనుజు లార ?                         20

అవిటిమే  కాని  పూజకు అర్హులవమ ?

ఎవరు పెట్టారు ఈ కాంక్ష లెందు కయ్య? 

అంగ హీనుకు చేయూత నంద జేయ

పుణ్య మే కాని పాపంబు పొసుగు టెట్లు?                            21

అవిటి పూవుల ఆక్రోష మంత వినియు,

ఇదియె నిజమంచు మనసులో నెంచి కొనియు,

అంగ హీనుల సేవకే అంకిత మవ,

నిశ్చ యించితి వారికే సేవ లియగ !                                   22

Posted Yesterday by Pantula Sitapati Rao