ఓ కాకి గోల

                పితృ కార్యంబు రోజున  పిలచి పిలచి 
                ప్రీతికరమగు అన్నంబు పిడచ జేసి 
                భక్తి  శ్రద్ధతో పిడచను  బయట పెట్టి 
               వాయసమ ! వచ్చి తిన మంచు ప్రణతు లిడరె ! 

               మాదు రూపాన పెద్దలే  వచ్చె రనుచు ,
               పిడచ కరిచియు తినిమేము వెళ్ళు నంత  
               పంచ బక్ష్యపు పరమాన్న  వంటలన్ని,
               బందు హితులకు వడ్డించి విందు చెయరె !


               పిలచి పిలచియు పిడచను  పెట్టు మీరె,
               ఎడమ  చేతితో దులపరే నెంగి లైన ,
               "ఉష్షు" కాకంచు మామీద కస్సు మనుచు 
               తరిమి వేయుట మీ కెట్టి ధర్మ మయ్య ! 


               "కావు -కావంటు " తెల్లార గట్ట మేము 
                 గుంపు  గుంపుగా  నెగురుచు గోల జేయ 
                మేలు కొలుపుగా కొందరు మెచ్చు కునగ
                ' కాకి గోలని ' కొందరు  కసురు కొన రె !  

                 మాట మార్చుచు ఘాటుగా మాట లాడ 
                  'కబురు లికవద్దు'  'కాకమ్మ కధలు మాను '
                  మనుచు వారించి  కసరుట ననుచితమ్మ ?
                  ' కట్టు కధలకు  కాకమ్మ  కధలె ముద్దు' 

                    కట్టు బాటుకు మాజాతి  ఖ్యాతి గాంచె 
                    కాకి పిల్లకు ఆపద కలిగె నంటె ,
                    వేలకొలదిగా కాకులు  వ్రాలు నచట 
                    'పిల్ల ' రక్షించి నటనుంచి  వెలుదు మయ్య ! 


                     శాస్త్ర  మందున మాకున్న జ్ఞాన మంత 
                    కుండ అడుగున యున్నట్టి  కొలది నీరు 
                    బయట కొచ్చిన తీరుతో  బయట  పడియె ! 
                    కాకి చెప్పిన ఆకధే ఖ్యాతి గాంచె ! 


                    గ్రహణ  శక్తితో ప్రకృతి గమనములను 
                    తెలుసు కుందుము ముందుగా తెలివి తోడ 
                    తెలుసు కున్నట్టి విషయాన్ని  తెలుప నెంచి 
                    జాగృతిని జేయు యత్నంబు  చేతు మయ్య ! 

                    పార్కు లందున మీరెల్ల పార వేయు
                    నెంగి  లంతయు నట నుండి  నేరి వైచి 
                    పారి సుధ్యంబు కోసమై  పాటు పడిన 
                    మమ్ము తిట్టుట  భావ్యమా? మానవులకు !

                   సాధ్వి సీతమ్మ పట్ల నసభ్య మలర 
                   పాప మొనరించ నేకాక్షి  మైతి మేము ;
                  బ్రహ్మ అస్త్రంబు నెదురించ  వశము గాక 
                   రామ చంద్రుని శిక్షకు  రాలె కన్ను !